پاکستان میں ایکس (سابقہ ٹوئٹر) کی سروس 4 دن سے شدید متاثر ہے۔
تفصیلات کے مطابق پاکستان بھر میں مائیکرو بلاگنگ ویب سائٹ ٹوئٹر کی سروس چار دن سے شدید متاثر ہے، کچھ دیر کے لیے سوشل میڈیا سروس بحال ہوتی ہے اور پھر بند ہو جاتی ہے۔
اتوار کو آدھا گھنٹہ اور پیر کو ڈیڑھ گھنٹہ سروس بحال ہونے کے بعد مسلسل بند ہے، سوشل میڈیا کی بندش اور مانیٹرنگ سروس ڈاؤن ڈٹیکٹر کے مطابق پاکستان میں ہفتے کی رات 9 بجےسے ٹوئٹرکی سروس بند ہے۔
صارفین کوئی پوسٹ کر سکتے ہیں اور نہ ہی کچھ دیکھ سکتے ہیں، جب کہ پاکستان ٹیلی کمیونیکیشن اتھارٹی (پی ٹی اے) کی جانب سے ٹوئٹر سروس کے تعطل اور بندش کی وجوہ بتانے سے گریز کیا جا رہا ہے۔
