ایکس کے مالک ایلون مسک نے واٹس ایپ کے مد مقابل ڈائریکٹ میسجز کی جگہ ’ایکس چیٹ‘ متعارف کرانے کا اعلان کیا ہے۔
رپورٹ کے مطابق فیچر میں میسجز کے غائب ہوجانے اور ’بِٹ کوائن طرز‘ کی انکرپشن شامل ہوگی جو اس کو واٹس ایپ یا ٹیلی گرام جیسی روایتی پیغام رساں ایپس جیسا بناتا ہے۔
ایلون مسک نے گزشتہ روز ایکس پر ایک پوسٹ کے ذریعے ایک نئے فیچر کا اعلان کیا، جس میں اینڈ ٹو اینڈ انکرپشن، غائب ہونے والے پیغامات اور مختلف پلیٹ فارمز پر آڈیو/ویڈیو کالز جیسی جدید خصوصیات شامل ہیں۔
یہ نیا فیچر واٹس ایپ، ٹیلی گرام اور انسٹاگرام ڈی ایم جیسے مقبول میسجنگ سروسز کا مقابلہ کرنے کے لیے تیار کیا گیا ہے جس میں صارفین کو ایک ہموار اور محفوظ میسجنگ کا تجربہ فراہم کرنے کا دعویٰ کیا گیا ہے۔
ایکس چیٹ، ایکس ایپ کے پرانے ڈائریکٹ میسج سسٹم کا جدید اور مکمل اپڈیٹ ورژن ہے۔ اس کا مقصد صارفین کو ایک محفوظ، تیز اور زیادہ فیچرز والی میسجنگ سروس فراہم کرنا ہے۔
ایکس چیٹ میں صارفین کو اینڈ ٹو اینڈ انکرپشن، مخصوص وقت کے بعد خودکار طور پر ڈیلیٹ ہو جانے والے میسجز، فائل شیئرنگ اور وائس/ آڈیو کالنگ جیسے فیچرز دستیاب ہوں گے۔
یاد رہے کہ اکتوبر 2022 میں ٹوئٹر خریدنے اور اس کا نام بدل کر ایکس رکھنے کے بعد ایلون مسک پلیٹ فارم میں متعدد تبدیلیاں لائے ہیں اور اس کے ساتھ پے منٹ سسٹم کو جوڑنے اور اس کو ایک عالمی مارکیٹ پلیس بنانے منصوبے پیش کیے ہیں۔
