اسلام آباد: سابق وفاقی وزیراورسینئر بلوچ رہنماء یار محمد رند نے پاکستان تحریک انصاف میں شمولیت کا اعلان کردیا ہے۔
تفصیلات کے مطابق تحریک انصاف کے سربراہ عمران خان نے سینئر بلوچ رہنماء یارمحمد رند کے ہمراہ اسلام آباد میں پریس کانفرنس کی جس میں انہوں نے سابق وزیر کی تحریک انصاف میں شمولیت کا اعلان کیا۔
یارمحمد رند تحریک انصاف سے قبل ملت پارٹی، نینشل پارٹی اورق لیگ کے پلیٹ فارم سے سیاست کرچکے ہیں اور سابق صدر پرویز مشرف کے وفاقی وزیر برائے خوراک اور زراعت کے عہدے پر فائز رہ چکے ہیں۔
اس موقع پریارمحمد رند نے صحافیوں سے گفتگو کرتے ہوئے کہا کہ سابق صدر زرداری اور پیپلز پارٹی کی سابق حکومت دعویٰ کرتی ہے کہ ان کے دور میں کسی کو سیاسی انتقام کا نشانہ نہیں بنایا گیا لیکن وہ سیاسی انتقام کی زندہ مثال میڈیا کے سامنے موجود ہیں۔
انہوں نے یہ بھی کہاکہ ان پر 16 مقدمات قائم کئے گئے جن میں ہر قسم کے جرائم شامل تھے اورانہی مقدمات کی بناپرانہیں انتخابات میں حصہ نہیں لینے دیا گیا۔
یار محمد رند کا یہ بھی کہنا تھا کہ سندھ اور بلوچستان میں بہت سے اہم افراد تحریک انصاف میں شمولیت اختیار کرناچاہتے ہیں۔
ان کا یہ بھی کہنا تھا کہ وہ بلوچستان میں تحریک انصاف کو منظم کریں گے اورصوبے کی بڑٰی جماعت بنائیں گے۔
اس موقع پرتحریک انصاف کے سربراہ کا کہناتھا کہ بلوچستان کے ساتھ زیادتی کی انتہا کردی گئی ہے، بڑا صوبہ دوسرے صوبوں کے وسائل چھین رہا ہے۔
انہوں نے یہ بھی کہا کہ تحریک انصاف میں یارمحمد رند کی شمولیت ان کی جماعت کی بڑی کامیابی ہے۔
