اسلام آباد : یاسر راؤ پی ٹی آئی حقیقی پارٹی کی رجسٹریشن کرانے الیکشن کمیشن پہنچ گئے اور اپیل کی کہ دعا کریں میں کامیاب ہوں۔
تفصیلات کے مطابق پی ٹی آئی حقیقی کے چیئرمین یاسر راؤ نے لیکشن کمیشن کے باہر میڈیا سے گفتگو کرتے ہوئے کہا کہ الیکشن کمیشن میں پی ٹی آئی حقیقی کی رجسٹریشن کرانے آیا ہوں، 3ہزار نوجوان ہماری جماعت میں شمولیت اختیار کرنا چاہتے ہیں۔
یاسر راؤ کا کہنا تھا کہ ہم اپنی مہم کا آغاز کریں گے ،بزرگوں سے اپیل ہے کہ دعا کریں میں کامیاب ہوں، پارٹی رجسٹریشن کا عمل شروع کر دیا ہے۔
بعد ازاں پی ٹی آئی حقیقی کے نام سے پارٹی کی رجسٹریشن کیلئے الیکشن کمیشن میں درخواست جمع کرادی گئی ، ملتان سے تعلق رکھنےوالے راؤیاسر نے الیکشن کمیشن میں درخواست جمع کرائی۔
گذشتہ روز پاکستان تحریک انصاف حقیقی کے قیام کا اعلان کیا گیا تھا، پی ٹی آئی حقیقی کے چیئرمین راؤ یاسر نے کہا تھا کہ تحریک انصاف حقیقی بہت جلد الیکشن کمیشن آف پاکستان میں رجسٹرڈ کراؤں گا۔
چیئرمین پی ٹی آئی حقیقی کا کہنا تھا کہ پاکستان اس وقت نازک گھڑی سے گزررہا ہے، خان صاحب نے نیا پاکستان کا خواب دکھایا تھا، نیا پاکستان تو بنا نہیں بلکہ بچا کچا بھی ختم کردیں۔
انھوں نے 9 مئی واقعات کی پرزور مذمت کرتے ہوئے کہا تھا کہ میں ایسے لوگوں کو ساتھ لے کر چلوں گا جو پاکستان کے ساتھ مخلص ہوں گے۔
