سئول: جنوبی کوریا کے سابق صدر یون سک یول کے وارنٹ گرفتاری کے لیے حکام نے عدالت میں درخواست دائر کر دی ہے۔
غیر ملکی میڈیا رپورٹس کے مطابق مشترکہ تحقیقاتی یونٹ نے پیر کو معزول صدر یون سک یول کے خلاف عدالتی وارنٹ گرفتاری کی درخواست دائر کر دی ہے۔
جنوبی کوریا کے قانون نافذ کرنے والے حکام مواخذے کے شکار صدر یون سک یول کو حراست میں لینا چاہتے ہیں، تاکہ اس بات کی تحقیقات کی جا سکے کہ آیا 3 دسمبر کو ان کا قلیل مدتی مارشل لا کا حکم نامہ بغاوت کے مترادف تھا یا نہیں۔
کرپشن انوسٹیگیشن آفس نے تصدیق کی ہے کہ اس نے سئول ویسٹرن ڈسٹرکٹ کورٹ سے وارنٹ کی درخواست کی ہے، کہ وہ یون سے اختیارات کے ناجائز استعمال اور بغاوت کو منظم کرنے کے الزام میں پوچھ گچھ کرنے کا ارادہ رکھتے ہیں۔
دوسری طرف صدر یون کے وکیل نے گرفتاری کی کوشش کی مذمت کی اور اسی عدالت میں اس کے خلاف چیلنج دائر کیا، اور یہ دلیل دی کہ وارنٹ کی درخواست غلط ہے، وکیل نے یہ بھی دعویٰ کیا کہ انسداد بدعنوانی ایجنسی کے پاس بغاوت کے الزامات کی تحقیقات کرنے کا قانونی اختیار نہیں ہے۔
ایک ہفتے میں طیاروں کے 4 ہولناک حادثات نے دنیا کو تشویش میں مبتلا کر دیا
مارشل لا لگانے پر یون کے وارنٹ گرفتاری جاری کرنے کا فیصلہ عدالت کرے گی، واضح رہے کہ جنوبی کوریا کے سابق صدر یون سک یول 14 دسمبر کو مارشل لا کے مختصر اعلان پر پارلیمنٹ میں مواخذے کے بعد معزول کر دیے گئے تھے۔
جنوبی کوریا کی پارلیمنٹ کے تمام 300 اراکین نے یون سک یول کے خلاف مواخذے پر ووٹنگ میں حصہ لیا تھا اور 204 ارکان نے ان کے مواخذے کے لیے ووٹ دیا تھا۔
