لاہور : سابق وزیر اعظم یوسف رضا گیلانی نے واضح کیا ہے کہ پیپلز پارٹی سولو فلائٹ نہیں کرے گی، پانامہ لیکس کے معاملے پر اپوزیشن جماعتوں کو ساتھ لے کر چلے گی۔ لطیف کھوسہ نے کہا کہ پاناما لیکس سنگین مسئلہ ہے، حکومت کا ساتھ دینے کا سوال ہی پیدا نہیں ہوتا۔
ان خیالات کا اظہار انہوں نے لاہور میں پریس کانفرنس سے خطاب کرتے ہوئے کیا، اس موقع پر ان کے ہمراہ سابق گورنر پنجاب لطیف کھوسہ، رہنما پیپلز پارٹی مخدوم احمد محمود بھی موجود تھے.
اپنے خطاب میں سابق وزیر اعظم یوسف رضا گیلانی نے کہا کہ پاناما لیکس پر ٹی اوآرز منظور کروانا چاہتے ہیں، احتجاج کی ضرورت ہوئی تو سب کو ساتھ لے چلیں گے۔
یوسف رضا گیلانی کا کہنا تھا کہ پیپلز پارٹی کی تنظیم نو کے لئے سفارشات مکمل کرلی گئی ہیں۔ نئے پارٹی عہدیداروں سے بلاول بھٹو زرداری حلف لیں گے۔
اس موقع پر لطیف کھوسہ نے کہا کہ تین اگست کو الیکشن کمشن میں وزیر اعظم کے خاندان کی نااہلی کے لئے دلائل دئے جائیں گے۔
رہنما پیپلز پارٹی مخدوم احمد محمود کا کہنا تھا کہ پنجاب حکومت کا بلدیاتی اداروں کو اختیارات دینے کا کوئی ارادہ نہیں۔ ان کا کہنا تھا کہ پنجاب حکومت ریاستی دباؤ کے ذریعے رحیم یار خان میں پیپلز پارٹی کی بلدیاتی انتخابات میں اکثریت کو اقلیت میں تبدیل کرنے کی سازش کررہی ہے۔
