کراچی سے تعلق رکھنے والی ٹینس کی کھلاڑی زینب علی نقوی اسلام آباد میں انتقال کرگئیں۔
اے آر وائی نیوز کے مطابق کراچی سے تعلق رکھنے والی زینب علی نقوی آئی ٹی ایف ٹورنامنٹ کھیلنے اسلام آباد گئی تھیں جہاں وہ رضائے الٰہی سے انتقال کرگئیں۔
ٹینس فیڈریشن کے مطابق زینب 12 فروری پیر کی رات میچ کھیل کر نہانے گئیں اور پھر دروازہ توڑ کر دیکھا گیا تو ان کا انتقال ہوچکا تھا۔
نومنتخب ٹینس فیڈریشن کے صدر اعصام الحق قریشی، سینیٹر سلیم سیف اللہ خان سمیت اعلیٰ عہدیداروں نے انکے انتقال پر دلی تعزیت کا اظہار کیا ہے جبکہ مرحومہ کی مغفرت کیلئے دعا بھی کی۔
پولیس کا کہنا ہے کہ زینب کی لاش پوسٹ مارٹم کے بعد ورثا کے حوالے کردی گئی ہے۔
ترجمان کیپٹل پولیس کا کہنا ہے کہ زینب علی نانی کے ہمراہ میچز کے لیے کراچی سے اسلام آباد آئی تھیں، ابتدائی رپورٹ کے مطابق دل کے دورے سے موت کا امکان ہے۔
پولیس کا بتانا ہے کہ زینب علی کے والدین قانونی کارروائی نہیں کروانا چاہتے۔
واضح رہے کہ زینب علی نقوی کراچی ریجن کی ٹاپ کھلاڑی تھیں، انہوں نے کئی انعامات اپنے نام کیے۔