ابو ظہبی : قومی کرکٹ ٹیم کے کھلاڑی یونس خان نے پاکستان کی ٹیسٹ کرکٹ کی تاریخ کا سب سے کامیاب ترین بلےباز کا اعزاز حاصل کرلیا۔ یونس خان نے ٹیسٹ کرکٹ میں 8833 رنز بنا کر جاوید میانداد کا ریکارڈ توڑ کر پاکستان کی طرف سے سب سے زیادہ رنز بنانے کا ریکارڈ قائم کردیا ہے۔
یونس خان کو پاکستان کی طرف سے سب سے زیادہ تیس ٹیسٹ سنچریاں بنانے کا اعزاز بھی حاصل ہے۔ منگل کے روز ابو ظہبی میں کھیلے جانے والے پاک انگلینڈ ٹیسٹ میچ سے قبل یونس خان کو یہ ریکارڈ توڑنے کیلئے 19 رنز درکا رتھے جو انہوں نے تیسری وکٹ پر میچ کے62 ویں اوور میں چھکا لگا کر مکمل کرلئے ہیں۔
قابل ذکر بات یہ ہے کہ جاوید میانداد نے یہ ریکارڈ 124 ٹیسٹ میچز میں قائم کیا تھا جبکہ یونس خان نے یہ سنگِ میل 102 میچز میں عبور کرلیا ہے۔
یونس خان نے 1 ٹرپل سنچری،5 ڈبل سنچریوں ،30 سنچریوں اور 29 نصف سنچریوں کی مدد سے یہ ہدف عبور کیا ہے۔
جاوید میانداد کا سب سے زیادہ رنز کاریکارڈ 30 سال تک قائم رہا ہے۔یونس خان کی قیادت میں پاکستان کرکٹ ٹیم نے ٹی 20 ورلڈ کپ جیتا تھا جس پر انہیں 2010 میں صدارتی پرائڈ آف پرفارمنس ایوارڈ بھی مل چکا ہے۔
یونس خان واحد پاکستانی کھلاڑی ہیں جنہوں نے ہرٹیسٹ ٹیم کے خلاف سنچری اسکور کررکھی ہے۔ قومی بیٹنگ لائن کا اہم ستون قرار دیئے جانے والے کھلاڑی جسے ہُھلانا بولرز کے بس کی بات نہیں۔
وکٹ پر جم جائیں تو کھیل کا نقشہ بدلنا ان کے بائیں ہاتھ کا کھیل بن جاتا ہے۔ مردان کے پٹھان کا کہنا ہے کہ ہر دن نیا ہوتا ہے اور یہ بات انہوں نے لیجنڈ کرکٹر جاوید میانداد سے سیکھی ہے۔
