راولپنڈی : جعلی اکاؤنٹس کیس میں سابق وزیراعظم یوسف رضا گیلانی نیب میں پیش ہوگئے ، ان پر آصف زرداری اور نوازشریف کوگاڑیاں گفٹ کرنے کا الزام ہیں جبکہ ادائیگیاں جعلی اکاؤنٹس سے کی گئیں۔
تفصیلات کے مطابق سابق وزیراعظم یوسف رضا گیلانی جعلی اکاؤنٹس کیس میں نیب طلبی پراولڈ ہیڈ کوارٹر پہنچے، جہاں نیب کی کمبائن انوسٹیگیشن ٹیم نے سابق وزیر اعظم سے پوچھ گچھ کی ، سابق وزیر اعظم کو گاڑیاں تحفہ میں دینے کے الزام میں طلب کیا گیا تھا۔
میڈیا سے گفتگو میں انکا کہنا تھا کہ نوازشریف اورآصف علی زرداری کوگاڑیاں گفٹ کرنے پر بلایا گیا ہے نیب میں اس طرح کے کیسز بنائے جاتے ہیں، گھبرانے والے نہیں۔
پیشی کے بعد میڈیا سے گفتگومیں یوسف رضا گیلانی نے کہاکہ نوازشریف اور آصف زرداری کو گفٹ دینا ان کا اختیارتھا الزام ہے کہ گفٹس کی پیمنٹ جعلی اکاونٹس سے کی گئی تمام الزامات کا معاملہ عدالتوں میں جانے پر فیصلہ ہوگا۔
سابق وزیراعظم کا کہنا تھاکہ بلاول سے قوم کو امیدیں ہیں اور آصف زرداری تجربہ کار سیاستدان ہیں تاہم موجودہ حکومت بے اختیار ہے جس کا سب کو اندازہ ہے۔
مزید پڑھیں : جعلی اکاؤنٹس کیس : وزیراعلیٰ سندھ مراد علی شاہ نے بیان ریکارڈ کرادیا
یوسف رضا گیلانی کا کہنا تھا کہ نیب کی جانب سے دیے گئے سوالنامے کا جواب دینے کیلئے دوہفتے کی مہلت طلب کی ہے۔
یاد رہے 26 مارچ کو جعلی اکاؤنٹس کیس میں وزیراعلیٰ سندھ مراد علی شاہ نے بیان ریکارڈ کرایا تھا ، نیب کی 6رکنی ٹیم نے وزیراعلیٰ سندھ سے ٹھٹھہ، دادو شوگرملز کیس میں پوچھ گچھ کی تھی۔
واضح رہے اس سے قبل 20 مارچ کو پیپلزپارٹی چیئرمین بلاول بھٹو اور شریک چیئرمین آصف زرداری نے پارک لین کمپنی کیس میں نیب میں پیش ہوکر بیان ریکارڈ کرادیا، تفتیشی حکام نے دونوں سے 45 منٹ سے زائد پوچھ گچھ کی جبکہ ویڈیو بیان بھی ریکارڈ کیا گیاتھا۔
