ملتان: پیپلزپارٹی کے رہنما یوسف رضا گیلانی نے حسین حقانی کے معاملے پر خاموشی توڑتے ہوئے کہا ہے کہ ملکی سربراہ کو آئین اور قانون کی پابندی کے مطابق ویزے جاری کرنے کا اختیار حاصل ہے، سابق سفیر کو ویزے اجرا کے لیے مشروط اختیارات دیے گئے تھے۔
ملتان میں پریس کانفرنس کرتے ہوئے سابق وزیراعظم نے کہا کہ حسین حقانی کے آرٹیکل کو بلاوجہ مسئلہ بنایا جارہا ہے، سابق سفیر نے بیان دیا کہ ایبٹ آباد آپریشن میں حصہ لینے والے امریکی فوجیوں کو کلیئرنس کے بعد ویزے جاری کیے گئے مگر یہ بات غلط ہے کیونکہ آپریشن میں حصہ لینے والے اہلکار بغیر ویزے پاکستان میں داخل ہوئے۔
انہوں نے کہا کہ ویزے جاری کرنے کا اختیار وزیراعظم کو ہوتا ہے تاہم حسین حقانی کو خصوصی اختیارات مشروت اجازت پر دئیے گئے تھے، سفیر کو اختیارات دینے کا مقصد یہ نہیں تھا کہ وہ قانونی تفاضوں کو نظر انداز کردے، عملے اور ایجنسیز کو نظر انداز کر کے کسی کو ویزے جاری نہیں کیے جاسکتے۔
مزید پڑھیں: پیپلز پارٹی کی حکومت نے دفتر خارجہ کی ہدایت کو نظر انداز کیا
یوسف رضا گیلانی نے کہا کہ امریکی اسپیشل فوسز کو ویزے جاری کرنے کا اختیار نہیں تاہم عام امریکیوں کو ضابطے کے تحت ویزے جاری کرنے کی ہدایت کی تھی، امریکا کو شمس ائیربیس استعمال کرنے کی جازت مشرف نے دی اور اس معاملے پر جوڈیشل کمیشن بھی بنایا گیا تھا، حسین حقانی خود بھی پیش ہوئے اگر اُس کی رپورٹ منظر عام پر لائی جاتی تو ایسے سوالات نہیں اٹھائے جاتے۔
سابق وزیراعظم نے کہا کہ وزیراعظم اختیارات کو قانون کے دائرے میں رہ کر استعمال کرتا ہے، بطور وزیراعظم کسی قانون کی خلاف ورزی نہیں کی تاہم اگر کوئی خط تحریر کیا تو وہ بھی قانون کے مطابق ہی تھا، یہ ممکن نہیں کہ ویزے قانون کے برعکس جاری کیے گئے ہوں۔ یوسف رضا گیلانی نے مزید کہا کہ حکومت اس خوف میں ہے کہ پی پی دوبارہ اقتدار میں نہ آجائے۔
