کراچی کے علاقے اورنگی ٹاؤن میں شہریوں کے ہاتھوں ڈاکو سمجھ کر مارے جانے والے دونوں نوجوان بے گناہ نکلے۔
اے آر وائی نیوز کے مطابق تفتیشی حکام کا بتانا ہے کہ 7 مئی کو عوام کے تشدد سے ہلاک نوجوانوں کی شناخت ہوگئی ہے مقتولین میں بابر اور نذیر شامل ہیں۔
پولیس حکام کا کہنا ہے کہ تین دوست شادی کی تقریب سے گھر جانے کے لیے نکلے تھے کسی نے شک پر شور مچایا اور پھر ہجوم نے پیچھا کرکے تینوں کو تشدد کا نشانہ بنایا۔
پولیس کا بتانا ہے کہ عوام کے بہیمانہ تشدد کی ویڈیو بھی منظرعام پر آئی تھی جس میں دونوں نوجوان تشدد سے ہلاک جبکہ تیسرا دوست اویس زخمی ہوگیا تھا۔
اورنگی ٹاؤن سیکٹر 14 سی میں عوام کے تشدد سے دو ڈاکو ہلاک ، ایک زخمی حالت میں پولیس کے حوالے ! #Karachi #Orangi #Police pic.twitter.com/PvtZOZKq7A
— Ahmer Rehman Khan 🇵🇰 (@ahmerrehmankhan) May 6, 2023
تفتیشی حکام کا کہنا ہے کہ جائے وقوع سے ملنے والی موٹرسائیکل چوری کی تھی جبکہ پولیس نے زخمی اویس کو کیس میں نامزد کردیا۔
پولیس حکام کا کہنا ہے کہ برآمد موٹر سائیکل سے بھی مقتولین اور زخمی کا تعلق ثابت نہیں ہوا، تفتیش آگے بڑھی تو تینوں کے بے گناہ ہونے کا انکشاف ہوا ہے۔
پولیس کا بتانا ہے کہ تفتیش میں 150 افراد کو نامزدز کرکے فوٹیج کی مدد سے تین افراد کو گرفتار کیا گیا جبکہ دیگر ملزمان کی تلاش جاری ہے۔
