The news is by your side.

Advertisement

ڈونلڈ ٹرمپ کا ویڈیو چینل کب تک معطل رہے گا؟

واشنگٹن: سابق امریکی صدر ڈونلڈ ٹرمپ کا یو ٹیوب ویڈیو چینل تشدد کے خطرے تک معطل رہے گا۔

تفصیلات کے مطابق ویڈیو شیئرنگ پلیٹ فارم یو ٹیوب کی چیف ایگزیکٹو آفیسر سوسن ووجِسکی نے کہا ہے کہ تشدد کا خطرہ برقرار رہنے تک ٹرمپ کا آن لائن ویڈیو شیئرنگ چینل معطل رہے گا۔

سی ای او سوسن ووجِسکی کا کہنا تھا کہ ڈونلڈ ٹرمپ کے چینل کو عارضی طور پر معطل کیا گیا ہے، یہ معطلی اس وقت ختم کی جائے گی جب تشدد کا خطرہ کم ہو جائے گا۔

یو ٹیوب سی ای او نے جمعرات کو کہا کہ معطلی ختم کیے جانے کے بعد اگر سابق امریکی صدر نے قوانین کی خلاف ورزی کی تو ان کا چینل دوبارہ معطل کر دیا جائے گا۔

یو ٹیوب سی ای او سوسن ووجِسکی

یاد رہے کہ امریکی پارلیمنٹ پر حملے کے تناظر میں ڈونلڈ ٹرمپ کا اکاؤنٹ 12 جنوری کو معطل کیا گیا تھا۔ ووجسکی کا کہنا تھا کہ یہ ابھی نہیں کہا جا سکتا کہ ٹرمپ کے اکاؤنٹ کی معطلی کب ختم ہوگی۔

واضح رہے کہ فیس بک اور ٹویٹر پلیٹ فارمز نے اس سے بھی پہلے تشدد کے خطرے کے پیش نظر ڈونلڈ ٹرمپ کے اکاؤنٹ معطل کر دیے تھے۔

یوٹیوب نے کہا ہے کہ ٹرمپ کے اکاؤنٹ نے ایک ویڈیو اپ لوڈ کرنے کی کوشش کی تھی، جس نے اس کی پالیسیوں کی خلاف ورزی کی، جس پر اکاؤنٹ پلیٹ فارم کے رہنما خطوط کے تحت 7 دن کے لیے خود کار طور پر معطل ہوا، بعد ازاں اس معطلی میں توسیع کی گئی۔

سوسن ووجسکی نے ایک تھنک ٹینک اٹلانٹک کونسل کی تقریب میں کہا کہ میں اس بات کی تصدیق کرنا چاہتی ہوں کہ ہم چینل کی معطلی کو ختم کر دیں گے، جب ہم اس بات کا تعین کر لیں گے کہ تشدد کا خطرہ کم ہو گیا ہے۔

Comments

یہ بھی پڑھیں