سان فرانسسکو: یوٹیوب کی جانب سے صارفین کے لیے بڑی خبر ہے، کمپنی نے شاپنگ فیچرز کی ٹیسٹنگ شروع کر دی۔
تفصیلات کے مطابق یوٹیوب نے اپنے ویڈیو پلیٹ فارم شارٹس پر مارکیٹنگ کے ساتھ ساتھ شاپنگ کے نئے فیچرز کی جانچ بھی شروع کر دی ہے۔
TechCrunch کے مطابق شاپنگ سے متعلق نئے فیچرز کے تحت صارفین ویب براؤز کرتے وقت مصنوعات کو بھی براؤز کر سکیں گے اور انھیں خرید سکیں گے۔
ویڈیو شیئرنگ پلیٹ فارم نے ابتدائی طور پر امریکا میں یوٹیوب شارٹس پر مخصوص تعداد میں اسٹورز کے لیے شاپنگ فیچرز متعارف کرائے ہیں، یہ اسٹورز اپنی مصنوعات ٹیگ کرنے لگے ہیں۔
یوٹیوب کے مطابق ان مصنوعات تک امریکا ہی نہیں بلکہ بھارت، برازیل، کینیڈا اور آسٹریلیا کے صارفین بھی رسائی کر سکتے ہیں، یعنی ان ممالک کے یوٹیوب صارفین ٹیگ کردہ مصنوعات کو دیکھ سکتے ہیں۔
یوٹیوب کا کہنا ہے کہ اس نے مزید ممالک میں یہ فیچرز پیش کرنے کی منصوبہ بندی کر لی ہے۔
یوٹیوب کے ترجمان نے ایک ای میل میں ٹیک کرنچ کو بتایا کہ ہم اس بات پر پختہ یقین رکھتے ہیں کہ کاروبار قائم کرنے کے لیے یوٹیوب کری ایٹرز کے لیے ایک بہترین جگہ ہے اور شاپنگ ظاہر ہے کہ اس کا ایک اہم حصہ ہے۔
