انقرہ : اکثر لوگ اپنی انفرادیت اور اپنی صلاحیتوں کو دکھانے کیلئے کسی بھی حد تک جاسکتے ہیں، چاہے اس کیلئے انہیں اپنی جان کو خطرے میں ہی کیوں نہ ڈالنا پڑے۔
ایک ایسی ہی حرکت ایک 25سالہ نوجوان نے بھی کی جس کی ویڈیو سوشل میڈیا پر دیکھ کر کمزور دل والے لوگوں نے خوف کے باعث آنکھوں پر ہاتھ رکھ لیے۔
ہوا کچھ یوں کہ ترکی کے رہائشی ایک یو ٹیوبر نے خود کو تابوت میں بند کر لیا اور قبر میں کچھ گھنٹے گزارنے کے بعد وہ حیرت انگیز طور پر بحفاظت باہر آگیا۔
عالمی خبر رساں ادارے کے مطابق ترکی میں محمد بہجیجک نامی نوجوان یوٹیوبر نے ساڑھے چار لاکھ سبسکرائبر ہونے کے بعد فالورز سے کیا گیا وعدہ خود کو دفن کرکے پورا کردیا۔
یوٹیوبر نے اپنے فالورز سے وعدہ کیا تھا کہ ساڑھے چار لاکھ سبسکرائبر ہونے پر وہ خود کو ایک تابوت میں بند کرکے کئی گھنٹے قبر میں گزاریں گے اور اس کی ویڈیو اپنے یوٹیوب چینل پر اپ لوڈ بھی کریں گے۔
اس مقصد کے لیے نوجوان یوٹیوبر اسٹار نے خصوصی تابوت بنوایا تھا جس کی تیاری میں 20 ہزار لیرا کا خرچہ آیا تھا۔ قبر میں 6 گھنٹے رہنے کے تجربے دوران کسی ہنگامی صورت حال سے نمٹنے کے لیے ایمبولینس اور میڈیکل ٹیم بھی موجود تھی۔
میڈیکل ٹیم کے پاس آکسیجن سیلنڈر، کیمرے، ریڈیو اور متعدد طبی آلات بھی رکھے تاکہ قبر میں موجودگی کے دوران یوٹیوبر کی صحت کی نگرانی کی جا سکے۔
نوجوان یوٹیوبر کو 6 گھنٹے بعد قبر سے نکالا گیا ان کی حالت بہتر تھی اور انہوں نے یہ ویڈیو اپنے مداحوں کے نام کردی۔
