لاہور: حکومت پنجاب کے ترجمان زعیم قادری نے کہا ہے کہ نوازشریف وزارت عظمیٰ کے سرکا تاج ہیں، قوم نواز شریف کوتین بار اقتدار میں لے کرآئی، نوازشریف کی ذات پاکستان مسلم لیگ ن تک محدود نہیں ہے، پاناما کیس کی اہمیت کا فیصلہ تاریخ میں ہوگا۔
ان خیالات کااظہارانہوں نے لاہورمیں میڈیا کے نمائندوں سے بات چیت کرتے ہوئے کیا، زعیم قادری نے کہا کہ نوازشریف کسی وزارت عظمیٰ کے مرہون منت نہیں، نہ ہی نوازشریف کی ذات پاکستان مسلم لیگ ن تک محدود ہے۔
انہوں نے کہا کہ قوم نے نوازشریف کو تین بار وزیراعظم منتخب کیا اور تینوں مرتبہ عوام کے بھاری مینڈیٹ کومنقطع کردیا گیا۔
ان کا کہنا تھا کہ بہت جلد نوازشریف کی لاہور آمد پر نواز شریف کا شانداراستقبال کیا جائے گا، لاہور آمد پر نوازشریف اپنے آنے والے سیاسی سفرکا اعلان کریں گے، نوازشریف قوم کی امنگوں پر پورا اتریں گے۔
زعیم قادری نے کہا کہ قوم سےاپیل ہے کہ نوازشریف کی جدوجہد میں ان کاساتھ دیں، نظریاتی کارکنوں سے کہتاہوں نواز شریف کا سفر اقتدار کیلئے نہیں، ن لیگ کی بنیادی حقوق کی جدوجہد جاری رہےگی، ہم نے عدالت کا فیصلہ دل سے قبول کیا اب عوام کا فیصلہ بھی آئے گا۔