لاہور: سابق چیئرمین کرکٹ بورڈ ذکا اشرف نے کہا ہے کہ پی سی بی کی چیئرمین شپ کے حوالے سے ان پر جو اعتماد کیا جا رہا ہے، وہ اُس پر پورا اترنے کی کوشش کریں گے۔
تفصیلات کے مطابق چیئرمین پی سی بی کے لیے مضبوط امیدوار ذکا اشرف نے اے آر وائی نیوز سے خصوصی گفتگو کرتے ہوئے کہا کہ مجھ پر جو اعتماد کیا جا رہا ہے میں اس پر پورا اترنے کی کوشش کروں گا۔
ذکا اشرف نے کہا ایگزیکٹو بورڈ کے انتخابات ابھی ہونے ہیں، مجھے پہلے بھی ذمہ داریاں ملی تھیں اور میں نے وہ احسن طریقے سے ادا کیں، آئندہ بھی ایسا ہی کروں گا۔
پی سی بی بورڈ آف گورنرز سے متعلق اہم فیصلہ
واضح رہے کہ گزشتہ روز پاکستان کرکٹ بورڈ (پی سی بی) کے پیٹرن اِن چیف اور وزیر اعظم شہباز شریف نے سابق چیئرمین ذکا اشرف اور سینیئر وکیل مصطفیٰ رمدے کو پی سی بی کے بورڈ آف گورنرز کے لیے نامزد کیا تھا، جس کے بعد ذکا اشرف کے بلا مقابلہ چیئرمین پی سی بی منتخب ہونے کا امکان مضبوط ہو گیا ہے۔
