کراچی : پاکستان کی ابھرتی ہوئی اداکارہ زارا نور عباس نے اقوام متحدہ کے ادارہ برائے مہاجرین کے ہمراہ پاکستان میں مقیم خواتین مہاجرین کی معاونت کا اعادہ کرلیا۔
تفصیلات کے مطابق اداکارہ زارا نور عباس اقوام متحدہ کے ادارے برائے مہاجرین یونائٹیڈ نیشنز ہائی کمشنر فار ریفیوجی (یو این ایچ سی آر) اور مقامی ڈیزائنر ہما عدنان کے ہمراہ پاکستان میں مقیم خواتین مہاجرین کی امداد کرنے اور انہیں اپنے پیروں پر کھڑا کرنے کی کوششیں کررہی ہیں۔
گزشتہ روز زارا نور عباس نے سوشل میڈیا پر اپنے آفیشل اکاؤنٹز سے کیے گئے ٹویٹ میں خواتین مہاجرین کے ساتھ ملاقات کی تصاویر شیئر کرتے ہوئے کہا کہ آئیں انہیں خوش آمدید کہتے ہیں۔
Statelessness is a man-made problem. People are denied the right to identity which is as basic as having a life to live. Imagine when you cant call home; Home. But they live it up and down through it, like Heroes.@Refugees @UNHumanRights pic.twitter.com/5uwPj3yVUS
— Zara Noor Abbas Siddiqui (@ZaraNoorAbbas) November 21, 2019
آئیں ان لوگوں کے لیے روزگار فراہم کرنے اور اپنے پیروں پر کھڑا ہونے کے موقع فراہم کریں، صرف کہنے سے نہیں بلکہ عمل کرکے بھی دکھائیں، مجھے خوشی ہے کہ میں یواین ایچ سی آر اور ہما عدنان کے ساتھ مل کر ان لوگوں کے لیے کام کررہی ہوں۔
خیال رہے کہ ڈیزائنر ہما عدنان ایک پراجیکٹ چلارہی ہیں جس میں مہاجر خواتین کو سلائی اور جیولری بنانے کا ہنر سکھایا جاتا ہے بعد ازاں ان چیزوں کو فروخت کرکے یہ خواتین پیسے کماتی ہیں۔
بین الاقوامی ادارے یو این ایچ سی آر کے مطابق پاکستان میں مہاجرین کی ایک بڑی تعداد آباد ہے جن میں زیادہ تر افغان مہاجرین شامل ہیں۔
واضح رہے کہ اداکارہ ماہرہ خان کو رواں ماہ اقوام متحدہ کے ذیلی ادارے یو این ایچ سی آر نے اپنا خیر سگالی سفیر مقرر کیا تھا۔
