اسلام آباد: صدر مملکت آصف علی زرداری کا کہنا ہے کہ صحافیوں کو محفوظ اور سازگار ماحول فراہم کرنے کیلیے مزید اقدامات کی ضرورت ہے۔
صدر مملکت نے آزادی صحافت کے عالمی دن پر جاری اپنے پیغام میں کہا کہ پاکستان میں ایک آزاد اور ذمہ دار پریس کے فروغ کے عزم کا اعادہ کرتے ہیں، غزہ جیسے جنگ زدہ علاقوں میں جانیں گنوا دینے والے صحافیوں کو خراج عقیدت پیش کرتے ہیں۔
آصف علی زرداری نے کہا کہ دستور پاکستان کا آرٹیکل 19 چند ضوابط کے تحت آزادی اظہار اور آزاد صحافت کی ضمانت دیتا ہے، میڈیا مکالمے کے فروغ، سماجی، اقتصادی اور ماحولیاتی مسائل اجاگر کرنے کیلیے ناگزیر ہے، بدعنوانی بے نقاب کرنے اور پسماندہ طبقات کیلیے آواز بلند کرنے میں میڈیا کا اہم کردار ہے۔
یہ بھی پڑھیں: صدر آصف زرداری اور وزیراعظم شہباز شریف کی اہم ملاقات
انہوں نے کہا کہ ہم نے صحافیوں کے تحفظ اور فلاح و بہبود کیلیے بہت سے اقدامات کیے، صحافیوں کو محفوظ اور سازگار ماحول فراہم کرنے کیلیے مزید اقدامات کی ضرورت ہے، ایسا ماحول جہاں صحافی خوف و ہراس کے بغیر اپنے فرائض سر انجام دے سکیں وقت کی ضرورت ہے۔
ان کا کہنا تھا کہ میڈیا اعلیٰ صحافتی معیار، خبروں میں درستگی اور پیشہ ورانہ مہارت برقرار رکھے، جعلی خبروں، غلط معلومات اور سنسنی کے ماحول میں میڈیا کی ذمہ داری اور بھی بڑھ گئی ہے، شہریوں کے حقوق، سماجی و اقتصادی مسائل پر آگاہی میں میڈیا کا اہم کردار ہے۔
’جمہوری عمل میں عوام کی شرکت کی حوصلہ افزائی کیلیے میڈیا کا کردار اہم ہے۔ پریس کو عوام اور سرکاری اداروں کے درمیان پل کا کردار ادا کرنا چاہیے۔ میڈیا کو بے آواز لوگوں کی آواز بننا چاہیے، آزادی صحافت جمہوریت کا ایک لازمی عنصر ہے۔‘
صدر مملکت کا مزید کہنا تھا کہ آئیے آزادی صحافت کے تحفظ اور فروغ کے عزم کی تجدید کریں، امید ہے حکومت آزادی صحافت اور صحافیوں کے تحفظ، وقار اور آزادی کیلیے کام جاری رکھے گی، امید ہے ہمارا میڈیا قومی اور عالمی اہمیت کے مسائل پر آگاہی میں اپنا کردار ادا کرتا رہے گا۔
