اسلام آباد: سابق صدر اور پاکستان پیپلز پارٹی کے شریک چیئرمین آصف علی زرداری نے کہا ہے کہ جب ادارے کمزور ہوجائیں تو ملک مشکل میں پڑجاتا ہے، میاں صاحب اداروں کو کمزور کرنا چاہتے ہیں ان کی کوشش ہے محاذ آرائی کا ماحول بنے۔
ان خیالات کا اظہار انہوں نے میڈیا سے گفتگو کرتے ہوئے کیا، اصف زرداری کا کہنا تھا کہ (ن) لیگ کہتی ہے ہمیں سینیٹ الیکشن سے نکال دیا گیا، آپ کو نکالا نہیں گیا، آپ بحیثیتِ آزاد امید وار الیکشن لڑ سکتے ہیں، پی پی نے کبھی کسی ادارے کو لڑوانے کی کوشش نہیں کی۔
راؤ انوار مجرم ہے تو قانون کی گرفت میں ضرور آئے گا، آصف علی زرداری
انہوں نے کہا کہ ہم نے اسٹیبلشمنٹ اور پارلیمنٹ کے ساتھ کھڑے ہوکر حالات کا سامنا کیا، پنجاب بیورو کریسی میں ریاست کے ساتھ بغاوت کرائی جارہی ہے، چھوٹے میاں کو ڈر ہے موجودہ حالات کا وزن ان پر نہ گر جائے۔
ان کا کہنا تھا ماضی میں جسٹس (ر) قیوم نے مجھے سزا دی تھی، جسٹس قیوم کی ٹیپ کو سنیں تو شہباز شریف کی آواز بھی سنائی دے گی، ہم نے تو عدالت میں جاکر انصاف مانگا کوئی غیر جمہوری رویہ نہیں اپنایا، پیپلز پارٹی قوم کو مایوس نہیں کرنا چاہتی۔
بھارت ہمارے دوستوں کو گمراہ کررہا ہے‘ آصف علی زرداری
آصف زرداری نے کہا کہ موجودہ پاکستانی حکومت کی ناکامی کی وجہ سے مودی فائدہ اٹھا رہا ہے اور آپ ان کے ساتھ دوستی کرنے کی کوشش میں لگے ہیں، ہندو انتہا پسندوں کے رویوں کے باعث بھارت میں مسلمان کمیونٹی ملک چھوڑنے کا سوچ رہی ہے، بھارت نے اگر کوئی کوشش کی تو منہ توڑ جواب دیا جائے گا۔
ان کا مزید کہنا تھا کہ میاں صاحب کے جیو کے ساتھ اچھے تعلقات ہیں، میر شکیل میرے دوست ہیں لیکن ساتھ میاں صاحب کا دیتے ہیں، سب کو پتا ہے وہ ان کے ساتھ کیوں ہیں، میر شکیل سے اتنا کہوں گا ملک پر رحم کریں۔
خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔
