اسلام آباد: وزیر اعظم کے معاون خصوصی زلفی بخاری اور سعودی وزیر سیاحت احمد بن عقیل الخطیب کے درمیان پاکستان اور سعودی عرب میں سیاحت کے شعبے میں تعاون بڑھانے پر غور کیا گیا۔
تفصیلات کے مطابق سیاحت کے ادارے نیشنل ٹورازم بورڈ کے چیئرمین سید زلفی بخاری اور سعودی وزیر سیاحت احمد بن عقیل الخطیب نے ایک ویڈیو کال کے دوران سیاحت کے شعبے کو کھولنے کے لیے حکمت عملی ترتیب دینے پر گفتگو کی اور سیاحت کی معیشت کی بہتری میں اہمیت پر زور دیا۔
سعودی وزیر نے زلفی بخاری کو حال ہی میں تشکیل دیے گئے سعودی ٹورازم ڈیویلپمنٹ فنڈ کے بارے میں بتایا۔
احمد بن عقیل الخطیب نے سیاحت کے شعبے کی ترقی کے لیے ریگولیشن کا جائزہ لینے کی اہمیت پر روشنی ڈالی اور سعودی عرب میں پاکستانی سیاحت کو فروغ دینے کی پیشکش بھی کی۔
سعودی عرب اور پاکستان کے درمیان سیاحت کو فروغ دینے کے ساتھ ساتھ ثقافتی ورثے کو تحفظ دینے پر بھی اتفاق کیا گیا۔
زلفی بخاری نے سعودی وزیر سیاحت کو پاکستان میں سیاحت کے شعبے میں سرمایہ کاری کی دعوت بھی دی، انہوں نے سیاحت کو چھوٹے اور بڑے پیمانے پر ترقی دینے پر سعودی وزیر کی تعریف کی۔
زلفی بخاری نے سعودی وزیر کو پاکستانی سیاحت کو لانچ کرنے کے حوالے سے اپنے منصوبوں کے بارے میں آگاہ کرنے کے ساتھ ساتھ ٹورازم پراجیکٹس پر بات کرنے کے لیے اپنے سعودی عرب کے دورے کے بارے میں بھی بتایا جو وبا کی وجہ سے مؤخر کر دیا گیا تھا۔
