اسلام آباد: قائم مقام چیف الیکشن کمشنر انور ظہیر جمالی کی زیر صدارت الیکشن کمیشن کے اجلاس میں ریکارڈ میں موجود الزامات کا تمام مواد پیش کر دیا گیا۔
ذرائع کے مطابق الیکشن کمیشن کا خفیہ اجلاس اسلام آباد کے مقامی ہوٹل میں ہوا، اجلاس میں انتخابی دھاندلی سے متعلق عمران خان اور ڈاکٹر طاہر القادری کے الزامات پر غور کرنے کے ساتھ انتخابی اصلاحات سے متعلق معاملات پر بھی بات چیت ہوئی۔
الیکشن کمیشن نے ڈاکٹر طاہر القادری کے الزامات کی آڈیو ویڈیو ریکارڈ سمیت مختلف سیاسی جماعتوں کی طرف سے الیکشن کمیشن پر عائد الزامات کی رپورٹ طلب کرلی۔
الیکشن کمیشن کا اجلاس سیکیورٹی خدشات کی بنا پر اسلام آباد کے مقامی ہوٹل میں طلب کیاگیا، قائم مقام چیف الیکشن کمشنر کی تقرری کے بعد الیکشن کمیشن کا یہ پہلا اجلاس ہے۔
گزشتہ روز سابق ایڈیشنل سیکریٹری افضل خان کے انکشافات پر الیکشن کمیشن نے اجلاس طلب کیا تھا۔
