کراچی : اندھی گولی کا نشانہ بننے والے ایم کیو ایم کے کارکن وقاص شاہ کی نماز جنازہ ادا کردی گئی، متحدہ کے احتجاج کے بعد شہر میں کاروبار زندگی جزوی طور پر بحال ہوگیا ہے۔
ایم کیو ایم کے کارکن وقاص شاہ کی نماز جنازہ جناح گراونڈ عزیز آباد میں ادا کردی گئی، نمازِ جنازہ میں وقاص کے اہلخانہ ، ایم کیو ایم رابطہ کمیٹی کے ارکان سمیت کارکنان اور شہریوں کی بڑی تعداد شریک تھی۔ وقاص کے قتل کامقدمہ سرکاری مدعیت میں نامعلوم افراد کےخلاف درج کیا گیا۔وقاص ایم کیوایم شعبہ اطلاعات کا سرگرم کارکن تھا۔
وقاص علی شاہ ایک شعلہ بیاں مقرر تھے اور گزشتہ کئی برسوں سے ایم کیوایم اور اے پی ایم ایس او کے پروگراموں میں نظامت کے فرائض انجام دے رہے تھے۔
گزشتہ روز نائن زور پر رینجرز چھاپے کے خلاف احتجاج کے دوران نامعلوم سمت سے آنے والی گولی نے جواں سال وقاص کی زندگی کا چراغ گل کردیا تھا۔
ایم کیوایم کے یوم احتجاج کے بعد اب شہر میں کاروبار زندگی بحال ہونا شروع ہوگیا ہے، شہر کے چھوٹے بڑے کاروباری مراکز کھل گئے ہیں جبکہ سڑکوں پر پرائیوٹ ٹرانسپورٹ رواں دواں ہے جبکہ پبلک ٹرانسپورٹ معمول سے کم ہے ۔
