پاکستان تحریک انصاف کے وائس چیئرمین شاہ محمود قریشی کا کہنا ہے کہ مرکزی حکومت طالبان کے ساتھ مذاکرات کرنے میں ناکام اور غیر سنجیدہ دکھائی دیتی ہے، جس کے باعث ماحول خراب ہورہا ہے۔
کراچی میں میڈیا سے گفتگو میں شاہ محمود قریشی کا کہنا تھا کہ مذاکرات نہ ہونے کی صورت میں حکومتی حکمت عملی کیا ہے اور مذاکرات کس سے اور کیسے کیے جارہے ہیں اس پر حکومت پارلیمان اور سیاسی قیادت کو اعتماد میں لے، انکا کہنا تھا کہ بنوں واقعے میں اگر طالبان ملوث ہے تو اسکی مذمت کرتے ہیں،اسلام ہتھیاروں سے بات منوانے کی اجازت نہیں دیتا۔
انھوں نے کہا کہ کراچی میں امن قائم ہوتا دکھائی نہیں دے رہا،پولیس میں سیاسی مداخلت کے باعث آپریشن کو نقصان پہنچ رہا ہے، شاہ محمود قریشی نے کہا کہ قومی اثاثوں کی اونے پونے فروخت اور بندر بانٹ بند کی جائے ،نیب کیا کر رہا ہے،اداروں میں کرپشن بند اور ملکی خزانہ لوٹنے والوں کا احتساب کب ہوگا۔
