لندن : ایم کیو ایم کے قائد الطاف حسین کا کہنا ہے کہ شکایت کرنے والے صنعتکاروں کے نام معلوم کروا رہے ہیں۔
ایم کیو ایم کے قائد الطاف حسین نے کہا ہے کہ ان کی پریس کانفرنس کا بائیکاٹ کیا گیا، کبھی کے دن بڑے ہوتے ہیں اور کبھی کی راتیں، نواز شریف اپنے بیان پر قوم سے معافی مانگیں۔
انھوں نے کہا کہ جن صنعتکاروں نے شکایت کی ہے ان کے نام معلوم کروا رہے ہیں۔
اس سے قبل ایم کیوایم کے مرکزنائن زیرو پر کارکنوں سے خطاب میں الطاف حسین نے کہا کہ ان کی تحریک کو تینتیس سال بیت گئے ہیں، عوام کی فلاح و بہبود کے لیے زندگی کا طویل عرصہ گزارا۔
ایم کیو ایم کے قائد نے کہا کہ مظالم کے خلاف انہوں نے عدالتوں سے رجوع کیا لیکن کوئی فائدہ نہیں ہوا۔
الطاف حسین کا کہنا ہے کہ کچھ لوگ گھروں میں بیٹھ کر ان کی تقریر سن لیا کرتے تھے اس پر بھی پابندی لگادی گئی ہے۔
یاد رہے کہ گزشتہ روز وزیرِاعظم نواز شریف نے کراچی میں تقریب سے خطاب میں گورنر سندھ کو مخاطب کرتے ہوئے کہا گورنر صاحب صنعتکار شکایت کرتے ہیں، کراچی میں مکھی بھی مر جائے تو ہڑتال ہوتی ہے۔
