کراچی: سندھ کے مختلف سیاسی رہنماؤں اور تین سابق وزرائے اعلیٰ نے صوبے میں ایک نیا سیاسی اتحاد بنانے کا اعلان کردیا ہے۔
سندھ کے چار سابق وزراء اعلی کی ملاقات سابق وزیر اعلی سندھ ارباب غلام رحیم کی رہائش گاہ پر ہوئی جس میں فنکشنل مسلم لیگ سندھ کے صدر صدرالدین راشدی نے بھی شرکت کی ۔
میڈیا سے گفتگو میں لیاقت جتوئی نے کہا کہ سندھ میں کرپشن انتہاء پر ہے، گڈ گورننس نظر نہیں آتی، صوبے میں لاء ہے نہ کوئی آرڈر، پولیس کی سرپرستی میں چور ڈاکو دندنا رہے ہیں، کوئی ترقیاتی کام نہیں ہوا، اندرون سندھ لوگ بچے فروخت کرنے پر مجبور ہوگئے، ہزاروں اسکول بند ہیں، اسپتالوں میں دوائیاں موجود نہیں۔
انہوں نے کہا کہ سندھ کی بہتری کیلئے ایم کیو ایم کے دوستوں سے بات کریں گے، ملنے میں برائی نہیں، دھاندلیوں کا معاملہ بھی انتہائی سنگین ہے، سندھ حکومت کو سمجھا سمجھا کر تھک گئے، کچھ نہ ہونے پر ہی اتحاد بنایا ہے، ریفرنڈم کرالیں کس نے کام کیا ہے پتا چل جائے گا، سیاست نہیں چمکانا چاہتے، اتحاد قوم کی ضرورت ہے۔
سابق وزیراعلی سندھ سید غوث علی شاہ نے کہا کہ مسلم لیگ نواز نے سندھ کے الیکشن میں ہونے والی دھاندلی پر خاموشی اختیار کی اور پیپلزپارٹی کا ساتھ دیا۔ مسلم لیگ فنکشنل سندھ کے صدر صدرالدین راشدی نے کہا کہ مسلم لیگ کے جو رہنماء گھر بیٹھ گئے ہیں انہیں دوبارہ سیاست میں لانے کی کوشش کر رہے ہیں۔ تمام رہنماوں کا کہنا تھا کہ سندھ کو تباہی سے نکالنے کے لئے اتحاد ضروری ہے پیپلزپارٹی نے سندھ کو کرپشن کے دلدل میں دھکیل دیا ۔
