مچھ: سزائے موت کے منتظر صولت مرزا نے مشترکہ تحقیقاتی ٹیم کو اپنا بیان ریکارڈ کرانے کے بعد پہلی بار سینٹرل جیل مچھ میں اپنی شریکِ حیات اور اہل خانہ سے ملاقات کی۔
ذرائع کے مطابق بدنامِ زمانہ ٹارگٹ کلر جس نے پاکستانی سیاست میں تہلکہ مچا کررکھا ہے اپنے اہلِ خانہ سے ملاقات میں کہتا ہے کہ ’’ میں اپنے حصے کا کام کرچکا ہوں اور نہیں چاہتا کہ کوئی وہ غلطیاں دہرائے جو کہ میں نے کی ہیں‘‘۔
واضح رہے کہ جے آئی ٹی کی تشکیل اور اس کے سامنے انتہائی مفصل بیان دینے کے بعد صولت مرزا کی اپنے اہل خانہ سے یہ پہلی ملاقات ہے۔
گذشتہ ماہ پھانسی سے محض چند گھنٹے قبل صولت مرزا کی ایک متنازعہ ویڈیو ریلیز ہوئی جس کے بعد اس کی پھانسی ملتوی کرکے جے آئی ٹی تشکیل دی گئی تھی۔
صولت مرزا نے اپنے ویڈیو بیان میں کے ای ایس سی کے ایم ڈی شاہد حامد کو قتل کرنے کا اعتراف کرتے ہوئے کہا تھا کہ اسے ایسا کرنے کے احکامات ایم کیو ایم کے قائد الطاف حسین نے سینئر پارٹی رہنماء بابر غوری کے گھر پر ٹیلی فون کے ذریعے دئیے تھے۔
