فیصل آباد میں شہریوں کو غیرقانونی ہاؤسنگ اسکیم میں پلاٹوں کی رجسٹریشن کروانے کی دعوت دینے کے الزام میں سٹی ہاؤسنگ کے چیف ایگزیکٹو آفیسر عامر ملک کے خلاف فراڈ کا مقدمہ درج کرلیا گیا۔
فیصل آباد ڈویلپمنٹ اتھارٹی کے ڈائریکٹر ٹاؤن پلاننگ واجد حسن نے سٹی پولیس افسر ڈاکٹر حیدر اشرف کو دی گئی درخواست میں موقف اختیار کیا ہے کہ فیصل آباد میں سٹی ہاؤسنگ کے نام سے رہائشی کالونی کے اشتہارات شائع کروائے گئے ہیں۔
جن میں شہریوں کو پلاٹوں کی رجسٹریشن کروانے کی ترغیب دی گئی ہے حالانکہ اس نام سے فیصل آباد میں کسی اسکیم کا کوئی وجود ہے اور نہ ہی اس اسکیم کا کیس منظوری کے لئے جمع کروایا گیا ہے۔
سی پی او کی ہدایت پر تھانہ سول لائن پولیس نے سٹی ہاؤسنگ کے سی ای او عامر ملک کے خلاف تعزیرات پاکستان کی دفعات 420 ، 468 اور 471 کے تحت مقدمہ درج کر کے ملزم کی تلاش شروع کر دی ہے۔
