لاپتہ بلوچ افراد کی بازیابی کے لئے کوئٹہ سے نکلنے والا پیدل مارچ لاڑکانہ پہنچ گیا ہے، مارچ کے شرکاء نے پیپلز پارٹی کی جانب سے استقبال کو مسترد کردیا، قوم پرست جماعتوں نے استقبال کیا۔
لاپتہ بلوچ افراد کی بازیابی کیلئے چھپن روز قبل کوئٹہ سے روانہ ہونے والے مارچ کے شرکاء لاڑکانہ پہنچے تو پیپلز پارٹی کے سرپرست اعلی بلاول بھٹو زرداری کی ہدایت پر پیپلز پارٹی کے رہنماؤں اور کارکنوں نے رکن قومی اسمبلی محمد ایاز سومرو کی سربراہی میں استقبال کیا، لیکن مارچ کے شرکاء نے پیپلز پارٹی کے استقبال کو مسترد کردیا۔
مارچ کے شرکاء لاڑکانہ شہر کے اوٹھا چوک پر پہنچے تو جسقم، پیپلز پارٹی شہید بھٹو اور دیگر قوم پرست جماعتوں کے کارکنوں نے بھرپور استقبال کیا اور ان کو سندھی اجرک پہنائے، اس موقع پر میڈیا سے بات چیت کرتے ہوئے مارچ کے سربراہ ماما قدیر بلوچ نے کہا کہ سابق صدر پرویز مشرف کے دور میں ہمارے لوگ لاپتہ ہوئے اور زرداری کے دور میں ان کی لاشیں ملی۔
قدیر بلوچ نے کہا کہ اس وقت تک اٹھارہ ہزار سے زائد بلوچوں کو لاپتہ کیا گیا اور پندرہ سو سے زائد کی لاشیں ملی ہیں، ہمیں سندھ میں روکنے کے لئے ہماری سیکیورٹی چھینی گئی اور ہمیں ہر جگہ پر دھمکیاں دی گئیں لیکن ہمارا مارچ جاری رہا اور جاری رہے گا۔
