لاہور: اداکارہ میرا کا کہنا ہے کہ پاکستان تحریکِ انصاف کے چیئرمین عمران خان سے شادی کی پیشکش برقرار ہے، اپنے ہسپتال کے لئے فنڈز جمع کرنے کے لئے پاکستانی ٹیم اور فلمی ستاروں کے درمیان میچ منعقد کروائیں گی۔
قذافی اسٹیڈٰم لاہور میں اپنے ہسپتال کے لئے فنڈز جمع کرنے کے لیے جب اداکارہ میرا پہنچیں تو سابق ٹیسٹ کرکٹر باسط علی نے ان کا استقبال کیا۔
اداکارہ میرا نے میڈیا سے گفتگو کرتے ہوئے کہا کہ وہ اپنے ہسپتال کے لئے پاکستانی ٹیم اور فلمی ستاروں کی ٹیم کے درمیان فنڈ ریزنگ میچ کا اہتمام کریں گی اور بڑے بڑے کھلاڑیوں کو آوٹ کریں گی۔
میرا جی کا کہنا تھا کہ عمران خان سے شادی کی آفر اب بھی برقرار ہے، بس کپتان کے جواب کا انتظار ہے۔
اداکارہ میرا نے بتایا کہ وہ اپنے ہسپتال کے لئے اب تک اسی لاکھ روپے جمع کر چکی ہیں اور پچیس نومبر کو سیالکوٹ میں ہسپتال کا سنگِ بنیاد رکھیں گی۔
