کراچی : وزیراعلیٰ سندھ سید قائم علی شاہ نے کراچی کو پانی فراہمی کے منصوبے ۔ کے فور ۔ کا افتتاح کردیا ۔
اس موقع پر صحافیوں سے گفتگو کرتے ہوئے وزیراعلیٰ سندھ نے کہا کہ وزیراعظم سے پراجیکٹ کیلئے رقم مانگیں تو وہ کہتے ہیں کہ وزیرخزانہ سے بات کریں۔
وزیراعلیٰ سندھ قائم علی شاہ کا افتتاحی تقریب سے خطاب کرتے ہوئے کہنا تھا کہ وزیراعظم کراچی آتے ہیں اور امن و امان سے متعلق ہر طرح سے تعاون کرتے ہیں لیکن منصوبے کیلئے رقم کے معاملے پر کہتے ہیں کہ اس بارے میں وزیرخزانہ سے کہا جائے۔
وزیراعلی سندھ سید قائم علی شاہ نے کہا ہے کہ وزیر اعظم اچھے انسان ہیں پرمعاشی معاملات میں تعاون نہیں کرتے، وفاقی منصوبوں میں بھی سندھ کو نظر انداز کیا جارہا ہے۔
کراچی میں پانی کی فراہمی کا سب سے بڑا منصوبہ کے فور کو بھی وفاقی بجٹ میں شامل نہیں کیا گیا ، ہم نے اپنی مدد آپ کے تحت اللہ کا نام لیکر کام شروع کردیا ہے ۔
وزیراعلیٰ ہاؤس میں کے فور منصوبے کا سنگ بنیاد رکھنے کی تقریب سے خطاب کرتے ہوئے وزیراعلیٰ سندھ کاکہنا تھا کہ یہ منصوبہ پچیس ارب روپے کی لاگت سے 2017 میں مکمل ہوگا۔
وفاق نے یقین دہانی کرائی تھی کہ اس منصوبے پر آنے والے اخراجات کی آدھی رقم وفاقی حکومت دے گی پر تاحال اس منصوبے کیلئے کچھ نہیں دیا گیا ۔
ان کاکہنا تھا کہ کے فور منصوبہ برسوں سے سرد خانے میں پڑا تھا 2005سے اس منصوبے پر کام نہیں ہوا کراچی میں وسائل کی کمی کے باوجود لوگ پاکستان اور بیرون ملک سے یہاں آتے ہیں اور ہم نے اس شہر کی ترقی کو آئندہ بیس سال کی نگاہ سے دیکھ رہے ہیں۔
وزیراعلی سندھ نے کہا کہ ہمیں کہا گیا کہ وفاق نے کے فور منصوبے کے لئے دو ارب روپے بھیج دئیے لیکن ابھی تک تو موصول نہیں ہوئے پتا نہیں کہاں ہے لیکن ہم اس منصوبے سے پیچھے نہیں ہٹیں گے۔
