کراچی: پاکستان نیوی کی آپریشنل مشق ”رباط 2014“اختتامی سیشن کے ساتھ آج پاکستان نیوی ڈاکیارڈ میں اختتام پذیرہوگئی۔
چیف آف دی نیول اسٹاف ایڈمرل محمد ذکاء اللہ اس موقع پرمہمان ِ خصوصی تھے۔ شمالی بحیرہ عرب میں منعقد ہونے والی اس مشق میں فلیٹ یونٹس کی ایک بڑی تعداد نے شرکت کی جن میں بحری جہاز،آبدوزیں اور ہوائی جہاز شامل تھے۔
پاکستان نیوی میرینز اوراسپیشل فورسز کے علاوہ پاکستان میری ٹائم سیکیورٹی ایجنسی اورپاکستان فضائیہ بھی اس مشق کا حصہ تھے۔
پاکستان نیوی خطے کے بحری توازن کو برقراررکھنے میں کلیدی کردارادا کر رہی ہے جو کہ قومی اوربین الاقوامی معاشی استحکام کے لئے ضروری ہے اوراسی تناظر میں یہ مشق پاکستان نیوی کی آپریشنل تیاری کو جانچنے اورپاکستان فضائیہ کے ساتھ مشترکہ مشقوں اورآپریشنل منصوبوں کو مستحکم کرنے کے لیے کی گئی۔
