پشاور: پھانسی کے مجرم نیاز محمد کو آج صبح پشاور جیل میں سولی پر لٹکا دیا گیا، نیاز محمد کو سابق صدر پرویز مشرف پر قاتلانہ حملے میں موت کی سزا سنائی گئی تھی۔
پھانسی کے مجرم نیاز محمد کو تختہ دار پر لٹکا دیا گیا، صوابی سے تعلق رکھنے والے نیاز محمد کے ڈیتھ وارنٹ دو ہفتے قبل جاری ہوئے تھے، گزشتہ شب نیاز محمد کو سخت سیکیورٹی میں ہری پور جیل سے پشاور سینٹرل جیل منتقل کیا گیا، جہاں اہل خانہ سے ملاقات کے بعد مجرم کوصبح چھ بجکر چالیس منٹ پر پھانسی دی گئی۔
مجرم نیاز محمد پاک فضائیہ میں جونیئر ٹیکنیشن تھا، جسےچودہ دسمبر دوہزارچودہ کو راولپنڈی کے جھنڈا چیچی پل کو دھماکہ خیز مواد سے اڑا کر صدر پرویز مشرف پر قاتلانہ حملہ کرنے کی کوشش پر فوجی عدالت نے سزائے موت سنائی تھی۔
ڈاکٹرزکی رپورٹس کے بعد نیازمحمد کی لاش ورثاء کے حوالے کردی گئی، سزائے موت پر عائد پابندی اٹھائے جانے کے بعد نیاز محمد ساتواں دہشت گرد ہے، جسے پھانسی دی گئی ہے۔
