اسلام آباد: پاکستان تحریک انصاف کے سربراہ عمران خان نےکہا ہے کہ ماڈل ٹاون میں سترہ لوگ شہید ہوئے کوئی وارنٹ نہیں نکلا، اگر پی ٹی وی حملے میں ان کا ملوث ہونا ثابت کردیں تو سیاست چھوڑدیں گے، نوازشریف بیرون ملک صرف اپنی سرمایہ کاری کا جائزہ لینے جاتے ہیں۔
دھرنے کے شرکا سے خطاب کرتے ہوئے پاکستان تحریک انصاف کے سربراہ عمران خان نے کہا کہ حکمرانوں کو 30نومبر تک کے وقت کی تجویز دے چکاہوں، حکومتی وارنٹ کے ٹیکے سے مزید 90دن کے دھرنے کیلئے تیارہوں اگر پی ٹی وی حملے میں میرا ملوث ہونا ثابت کردیں سیاست چھوڑ دونگا، انہوں نے کہاکہ پی ٹی وی پر حملے کا میچ فکسڈ تھا۔
سربراہ تحریک انصاف نےمزید کہا کہ جعلی جمہوریت کیلئےنوازشریف اور آصف زرداری اکٹھے ہیں ملک میں جمہوریت کے نام پر بندربانٹ ہورہی ہے نوازشریف بیرون ملک دوروں میں صرف اپنی سرمایہ کاری کا جائزہ لینے جاتے ہیں۔عمران خان نے کہا کہ لندن کے مہنگے ترین ہوٹلز میں قوم کے پیسے پر عیاشی کی جارہی ہے۔
تحریک انصاف کے سربراہ نے جوڈیشل کمیشن کے حوالے سے اپنی تجویز کا دفاع کرتے ہوئے کہا کہ حکومت نےماناتھاکہ کمیشن میں آئی ایس آئی سمیت تمام ایجنسیاں شامل ہونگی۔ انہوں نے کہاکہ ہمارےپاس دستاویزہےجس میں درج ہےنوازشریف کےاستعفےکےبغیرتمام مطالبات منظورہیں۔
