کابل: سینکڑوں افغان شہریوں نے گزشتہ روز مولانا فضل الرحمان کے دورہ کابل کیخلاف احتجاج کیا۔
تفصیلات کے مطابق مولانا فضل الرحمن افغان صدر کی دعوت پر کابل کا دورہ کرنے والے پاکستانی سیاستدانوں کے وفد میں شامل ہیں اور افغان مظاہرین نے مولانا فضل الرحمن پر افغانستان میں طالبان کی سرگرمیوں کی حمایت کا الزام عائد کیا۔
مظاہرین نے کابل ائیرپورٹ پر ”قاتلوں کی جماعت کا افغانستان داخلہ بند کرو، طالبان کے حامی مردہ باد“ کے نعرے لگائے۔
ذرائع کے مطابق مظاہرین ان اطلاعات کے بعد ہوائی اڈے جانے والی شاہراه پر جمع ہوئے کہ فضل الرحمان پاکستانی سیاسی جماعتوں کے ایک وفد کے ہمراہ صدر اشرف غنی کی دعوت پر افغانستان کا دورہ کرنے کے لیے پہنچے ہیں۔ صدر غنی نے گزشتہ ہفتے ایک رسمی دعوت نامے کے تحت پاکستانی سیاسی جماعتوں کے رہنماوں کو اس دو روزہ دورے کی دعوت دی تهی۔
سرکاری ذرائع کے مطابق اس وفد میں عوامی نیشنل پارٹی کے سربراہ اسفندیار ولی خان، پشتونخوا ملی عوامی پارٹی کے رہنما محمود خان اچکزئی، اور سابق وفاقی وزیر آفتاب خان شیرپاؤ بھی شامل ہیں۔
