کراچی: شاہراہ ِفیصل پر پولیس چوکی پر دستی بم سے حملہ کیا گیا، جس کے نتیجے میں چار پولیس اہلکار زخمی ہوگئے، دھماکے کی ذمہ داری جنداللہ نے قبول کرلی ہے۔
کراچی کے محافظ ایک بار پھر دہشت گردوں کا نشانہ بن گئے، دھماکے کے بعد زخمیوں کو جناح ہسپتال منتقل کر دیا گیا، پولیس اور رینجرز نے علاقے کو گھیرے میں لے کر تحقیقات شروع کردیں ہیں۔
پولیس کے مطابق دھماکا اس قدر شدید تھا کہ اس سے زمین پر گڑھا پڑ گیا جبکہ اردگرد کی عمارتوں کے شیشے بھی ٹوٹ گئے۔
پولیس چیف غلام قادر تھیبو نے میڈیا سے بات کرتے ہوئے بتایا کہ نامعلوم افراد نے پل کے اوپر سےدستی بم پھینکا، دھماکے سے چوکی بری طرح متاثر ہوئی۔ اندرموجودسامان اور موٹر سائیکلیں بھی تباہ ہوگئیں۔
ذرائع کےمطابق زیادہ تر اہلکار چوکی کے اندر موجود تھے جس کی وجہ سے جانی نقصان نہیں ہوا۔ پولیس چوکی پرحملے کی ذمہ داری شدت پسند گروپ جنداللہ نے قبول کرلی ہے۔
