کوئٹہ : بلوچستان کے شہر کوئٹہ کے معروف تجارتی علاقے میں نامعلوم افراد کی فائرنگ سے باپ بیٹے سمیت پانچ افراد جاں بحق ہوگئے۔
واقعے کے بعد شہر کے وسطی علاقے کی دکانیں اور کاروبار مراکز بند ہوگئے، پولیس حکام کے مطابق شہر کے معروف تجارتی علاقے باچاخان چوک کے قریب سرکلر روڈ پر واقع چائے کی پتی کی دوکان پر نامعلوم موٹرسائیکل سواروں نے آکر فائر کھول دیا۔
جس سے باپ بیٹے سمیت تین افراد موقع پر جاں بحق اور تین زخمی ہوگئے ،زخمیوں کو سول ہسپتال اور سی ایم ایچ منتقل کردیا گیا، جہاں زخموں کی تاب نہ لاکر دونوں زخمی چل بسے ۔
پولیس حکام کے مطابق حملہ آور موٹرسائیکلوں پر آئے تھے جو واردات کے بعد ہوائی فائرنگ کرتے ہوئے فرار ہوگئے۔
واقعے کے بعد باچاخان چوک سرکلر روڈ اور ملحقہ علاقوں کی دکانیں اور کاروبار مراکز بند ہوگئے ۔
جاں بحق افراد کی نعشیں ضروری کارروائی کے بعد ورثاء کے حوالے کردی گئیں، جنہوں نے باچاخان چوک پر ہی نعشیں رکھ کر احتجاج کیا اور مشتعل افراد نے مسجد روڈ اور فاطمہ جناح روڈ کی دکانیں بھی بند کروادیں۔
