کوئٹہ : اسپنی روڈ پر ریمورٹ کنٹرول دھماکے میں سات افراد زخمی ہوئے جبکہ دو گاڑیاں تباہ ہوگئیں، دھماکے میں ڈی ایس پی کی گاڑی کو جزوی نقصان پہنچا۔
کوئٹہ میں اسپنی روڈ پر مویشی منڈی کے قریب دھماکہ ہوا، دھماکے کے نتیجے میں ایک بچے سمیت سات افراد زخمی ہوئے جبکہ ایک گاڑی اور رکشہ بھی مکمل طور پر تباہ ہوگئے۔
رپورٹ کے مطابق ڈی ایس پی کی گاڑی گذر رہی تھی کہ دھماکہ ہوا، جس کے نتیجے میں ڈی ایس پی کی گاڑی کو جزوی نقصان پہنچا، گاڑی میں موجود پولیس اہلکار اور ڈی ایس پی محفوظ رہے۔
زخمی ہونے والے سات افراد کو بولان میڈیکل کمپلیکس ہسپتال میں طبی امداد دی جا رہی ہے، زخمی ہونے والے بچے کی حالت تشویش ناک قرار دی جارہی ہے ۔
بی ڈی ایس کا کہنا ہے کہ ریمورٹ کنڑول دھماکے میں چالیس کلو گرام دھماکہ خیز مواد استعمال کیا گیا، دھماکےکے بعد پولیس اور ایف سی کی بھاری نفری نے علاقے کو گھیرے میں لے لیا ہے، ایف سی اہلکار سراغ رساں کتوں کی مدد سے جائے وقوعہ کی تحقیقات کر رہے ہیں۔
