لاہور: پیپلز پارٹی پنجاب کے صدر قمر زمان کائرہ نے کہا ہے کہ وزیراعظم نواز شریف جھوٹ پر جھوٹ بول رہے ہیں لیکن پانامہ کی چوری نہیں چھپ سکے گی۔
تفصیلات کے مطابق لاہور میں پریس کانفرنس سے خطاب کرتے ہوئے پیپلز پارٹی پنجاب کے صدر قمر زمان کائرہ کا کہنا تھا کہ وزیراعظم نواز شریف جھوٹ پر جھوٹ بول رہے ہیں لیکن پانامہ کی چوری نہیں چھپ سکے گی۔
انہوں نے کہا کہ صرف پیپلز پارٹی ہی دہشتگردوں کیخلاف کھڑی ہے، ہمیں الزام لگانے کی ضرورت نہیں، نون لیگ کے وزراء ہی ایک دوسرے کے بارے میں دہشتگردوں کی سرپرستی سے متعلق حقائق بیان کرتے رہتے ہیں۔
قمر زمان کائرہ کا کہنا تھا کہ نون لیگ کی صفوں میں دہشتگرد اور فرقہ پرست موجود ہیں، چودھری نثار کالعدم اور فرقہ وارانہ تنظیموں میں فرق کی دلیلیں پیش کر کے انہیں بچانا چاہتے ہیں۔
مزید پڑھیں : پیپلزپارٹی انیس جنوری سےحکومت کےخلاف تحریک شروع کرے گی
اس موقع پر پیپلز پارٹی کے رہنماء چودھری منظور کا کہنا تھا کہ چودھری نثار حکیم اللہ محسود کے قتل پر آنسو بہاتے رہے، بتائیں وہ دہشتگرد تھے یا فرقہ پرست۔
یاد رہے کہ چند روز قبل پیپلزپارٹی پنجاب کےصدرقمر زمان قائرہ نے کہاہےکہ حکومت نےہمارے چارمطالبات تسلیم نہیں کیے،انہوں نے کہاکہ انیس جنوری کوپیپلزپارٹی کا فیصل آبادمیں جلسہ ہوگا۔
قمر زمان کائرہ نے شکوہ کیا تھا کہ پیپلزپارٹی کوعدالتوں سےاس طرح انصاف نہیں ملتا ، جیسے نون لیگ کے لیے فیصلے ہوتے ہیں، عمران خان کو بھی شاید ہی انصاف مل سکے۔
