ڈاکٹر یار جان عبدالصمد پی ایچ ڈی، ایک ممتاز سینئر ریسرچ سائنٹسٹ اور معروف یونیورسٹی آف کیمبرج میں ٹیچنگ فیلو ہیں، ان کو اس باوقار ادارے میں پاکستان کے پہلے خلائی سائنس دان ہونے کا اعزاز حاصل ہے۔
ڈاکٹر صمد جدید ترین خلائی ٹیکنالوجیز کا مطالعہ کرتے ہیں اور اس شعبے میں انھیں متعدد با وقار ایوارڈز بھی مل چکے ہیں، ان کا تعلق بلوچستان کی ایک قصبے بلیدہ سے ہے۔
ڈاکٹر صمد نے پاکستان میں غلام اسحاق خان انسٹی ٹیوٹ سے انجینئرنگ میں گریجویشن کیا، انھوں نے ابتدائی تعلیم بلیدہ سے ہی حاصل کی، ڈاکٹر یار جان عبدالصمد کو ہمیشہ سے ہی زمینی ذخائر کو بروئے کار لانے میں خاص دل چسپی تھی، وہ مستقبل میں ایسی ٹیکنالوجیز متعارف کروانا چاہتے ہیں جو زمین کے ساتھ اسپیس میں بھی کارآمد ثابت ہوں۔
ڈاکٹر یار جان نے بلیدہ میں ایک غیر منافع بخش اسکول کا آغاز کیا ہے جو دنیا بھر میں سب سے کامیاب اسکولنگ سسٹم کے مطابق بنایا گیا ہے، ان کی یہ کاوش زندگیوں کو بدل رہی ہے اور بلیدہ کے روشن مستقبل کو تشکیل دے رہی ہے۔
ڈاکٹر یار جان عبدالصمد نے اس سلسلے میں کہا ’’میرے لیے بہت فخر کی بات تھی کہ جن لوگوں کے بارے میں، میں نے کتابوں میں پڑھا تھا ان کے ساتھ کام کرنے کا موقع ملا، پاکستان کے ہر بچے میں اتنی صلاحیت موجود ہے کہ وہ مجھ سے بھی زیادہ ترقی حاصل کر سکتا ہے۔‘‘
