سائنسدانوں کی ایک حالیہ تحقیق کے مطابق گلوبل وارمنگ یعنی عالمی درجہ حرارت میں اضافہ گردوں کے امراض میں اضافہ کرسکتا ہے۔
اس تحقیق میں گلوبل وارمنگ کی وجہ سے بڑھتے ہوئے درجہ حرارت اور پانی کی کمی کو گردوں کے شدید امراض کی وجہ بتایا گیا ہے۔ تحقیق کے مطابق اس کے باعث دیہاتوں میں رہنے والے افراد زیادہ متاثر ہوں گے۔
امریکا کی کولوراڈو یونیورسٹی کے پروفیسر رچرڈ جانسن کا کہنا ہے کہ گرم علاقوں میں کلائمٹ چینج کے اثرات اور گرمی میں اضافہ گردوں کے شدید امراض پیدا کرے گا اور یہ پہلی بیماری ہوگی جو موسمیاتی تبدیلیوں کی وجہ سے وبائی صورت اختیار کرجائے گی۔
تحقیق کے مطابق ان امراض سے کاشت کار زیادہ متاثر ہوں گے جو سخت گرمی کے دنوں میں بھی کھیتوں میں کام کریں گے۔
تحقیق کرنے والوں سائنسدانوں نے بتایا کہ اس کا تعلق پانی کی کمی سے بھی ہوگا۔ بارشوں میں کمی، گرمی میں اضافے اور موسمیاتی تبدیلیوں کی وجہ سے جب پانی کی قلت یا کمی ہوجائے گی تو گردوں کے امراض عام ہوجائیں گے۔
اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔
