بھارت کی ریاست اتر پردیش میں بچے کی جنس معلوم کرنے کیلیے حاملہ بیوی کا پیٹ کاٹنے والے درندہ صفت شوہر کو عمر قید کی سزا سنا دی گئی۔
میڈیا رپورٹس کے مطابق سفاک ملزم کی شناخت پنا لال کے نام سے ہوئی جس نے ستمبر 2020 میں حاملہ بیوی انیتا کا تیز دھار آلے سے پیٹ کاٹ دیا تھا۔
جوڑے کی شادی 22 سال قبل ہوئی تھی اور ان کی پانچ بیٹیاں ہیں تاہم دونوں میں اکثر جھگڑا رہتا تھا کیونکہ پنا لال کو بیٹے کی خواہش تھی۔
انیتا کے اہل خانہ میاں بیوی میں تنازع سے بخوبی واقف تھے اور اکثر داماد کو سمجھانے کی کوشش کرتے تھے لیکن وہ سامنے سے انیتا کو طلاق دینے کی دھمکی دیتا تھا۔
ایک دن جوڑے میں جھگڑا ہوا تو پنا لال نے انیتا کو اس کا پیٹ کاٹ کر بچے کی جنس معلوم کرنے کی دھمکی دی جس پر خاتون نے مزاحمت کی۔ جب وہ جان بچا کر بھاگنے لگی تو ملزم نے تیز دھار آلے سے اس کے پیٹ پر حملہ کیا۔
خاتون نے عدالت کو بتایا کہ اُس وقت میں 8 ماہ کی حاملہ تھی، شوہر کا حملہ اس قدر زوردار تھا کہ آنتیں پیٹ سے لٹک گئیں، میں بھاگتی ہوئی گھر سے نکلی تو بھائی نے دیکھا اور مجھے اسپتال لے گیا۔
پنا لال کے حملے میں انیتا کی جان بچ گئی لیکن اس کا بچہ نہ بچ سکا۔
پنا لال نے عدالت میں مؤقف اختیار کیا کہ انیتا نے اپنے بھائیوں کے ساتھ جائیداد کا تنازع ہونے کی وجہ سے میرے خلاف جھوٹا مقدمہ درج کروانے کیلیے خود کو زخمی کیا تھا۔
