لاہور: پاکستان کرکٹ بورڈ (پی سی بی) نے پابندی کا شکارہونے والے آف اسپنر سعید اجمل کے ایکشن کی درستگی کے لئے سابق اسپنر ثقلین مشتاق کی خدمات حاصل کرنے کا فیصلہ کیا ہے۔
آئی سی سی نے غیر قانونی ایکشن کے سبب سعید اجمل کو مزید بین الاقوامی کرکٹ کھیلنے سے روک دیا ہے۔ پی سی بی اجمل پر پابندی کے خلاف اپیل کے بجائے ان کے ایکشن کی درستگی کوترجیح دے رہا ہے۔
اس سلسلے میں پی سی بی نے دوسرا کے موجد ثقلین مشتاق کی خدمات حاصل کرنے کا فیصلہ کیا ہے۔ ثقلین مشتاق کو لندن سے پاکستان طلب کیا جائے گا۔ سابق مایہ ناز آف اسپنر ثقلین مشتاق نے گزشتہ روز اجمل کے ایکشن کی درستگی کے لئے اپنی خدمات فراہم کرنے کی پیش کش کی تھی۔