آسٹریلیا اور انگلینڈ کے درمیان پانچ میچز کی ایشز سیریز کا آخری ٹیسٹ کل سے سڈنی میں کھیلا جائے گا۔ کینگروز سیریز میں کلین سوئپ اور انگلش ٹیم بقا کی جنگ لڑنے کے لئے میدان میں اتریں گے۔ انگلینڈ کے لئے حالیہ ایشیز سیریز ڈراؤنا خواب بن گئی ہے۔
پے در پے ناکامیوں نے انگلش ٹیم کے ہوش اڑادیئے ہیں۔ انگلینڈ کے لئے اب ایشز میں کلین سوئپ بچانےکے لالے پڑگئے ہیں۔ اب آخری معرکے کے لئے سڈنی میں میدان سجے گا۔ انگلینڈ لڑے گا بقا کی جنگ اور ساکھ بچانے کی پوری کوشش کرے گا ۔
ادھر آسٹریلیا دوہزار چھ کے بعد ایشیز سیریز میں وائٹ واش کے لئے میدان میں اترے گا۔ انگلینڈ کے خلاف آخری ٹیسٹ جیت کر میزبان ٹیم آئی سی سی رینکنگ میں پانچویں سے تیسرے نمبر پر آجائے گی۔
فاسٹ بولر مچل جونسن کے پاس پانچ میچز کی ایشز میں آسٹریلیا کی جانب سے سب سے زیادہ وکٹیں حاصل کرنے کا بہترین موقع ہے۔ مچل جونسن چار میچز میں اکتیس شکار کرچکے ہیں۔ مائیکل کلارک آخری ٹیسٹ جیت کر انگلینڈ کو ایشیز میں کلین سوئپ کرنے والے تیسرے کپتان بن سکتے ہیں۔
