کراچی : پاکستان کرکٹ ٹیم کے ہیڈکوچ وقار یونس کا کہنا ہے کہ دورہ سری لنکا میں ہر کھلاڑی نے اپنی ذمہ داری نبھائی،کامیابی پر بے حد خوش ہوں۔
ہیڈ کوچ وقار یونس نے اے آر وائی نیوز سے خصوصی گفتگو کرتے ہوئے کہا کہ ہے کہ دورہ سری لنکا میں کھیلے گئے تینوں فارمیٹ کی کرکٹ میں پاکستانی ٹیم نےشاندار کارکردگی دکھائی،کپتانوں کی قیادت اور کھلاڑیوں کی پرفارمنس نے شائقین کے دل جیت لیے۔
انکا کہنا تھا کہ ٹیسٹ سیریز میں کامیابی کا سہرا تجربہ کار کرکٹر یونس خان اور اسپنر یاسر شاہ کے سر سجتا ہے۔ ون ڈے سیریز میں کپتان اظہر علی اور نائب کپتان سرفراز احمد نے ذمہ داریوں کو خوش اسلوبی سے نبھایا اور شعیب ملک کی واپسی سے ٹیم کو کافی فائدہ پہنچا ہے۔
ہیڈ کوچ کے مطابق اچھی فیلڈنگ سے بولرز کا حوصلہ بڑھتا ہے، آئندہ دو ماہ کیلئے کھلاڑیوں کو فٹنس پلان دیا ہے تاکہ کارکردگی مزید بہتر بنائی جاسکے۔
