اسلام آباد:پاکستان تحریک ِانصاف کے سربراہ عمران خان آج پارلیمنٹ کے مشترکہ اجلاس میں شرکت نہیں کریں گے۔
تفصیلات کے مطابق تحریک ِ انصاف کے سربراہ نے آج ہونے والے پارلیمنٹ کے مشترکہ اجلاس میں شرکت نہ کرنے کا فیصلہ کیا ہے۔
عمران خان کے اس فیصلے کا محرک گذشتہ روز پارلیمنٹ میں ہونے والی تلخ کلامی اور خواجہ آصف کی جانب سے تحریکِ انصاف کے لئے اختیار کیا گیا جارحانہ رویہ بتایا جارہا ہے۔
گذشتہ روز پارلیمنٹ میں مسلم لیگ ن کے اراکین کی جانب سے اختیار کیے گئے رویے پر تحریکِ انصاف کی قیادت نے افسوس کا اظہار کیا ہے۔
ذرائع کا کہنا ہے کہ پی ٹی آئی کے اراکین آج ہونے والے اجلاس میں شرکت کرسکتے ہیں۔
واضح رہے کہ پاکستان تحریکِ انصاف نے گذشتہ سال موجودہ حکومت کے خلاف 127 دن طویل دھرنا دیا تھا اور اسی سلسلے میں ان کے اراکین نے قومی اسمبلی سے استعفے بھی دئیے تھے جنہیں اسپیکر نے منظور نہیں کیا تھا۔
