The news is by your side.

Advertisement

نیپالی آرمی چیف گورو رانا کا پاک فوج کے کیمپ کا دورہ

نیپال: زلزلے سے ہلاکتوں کی تعداد سات ہزار سے بڑھ گئی، نیپالی آرمی چیف نے متاثرین کی مدد کےلیے قائم پاک فوج کے کیمپ کا دورہ کیا۔

نیپالی آرمی چیف گورو رانا نے پاک فوج کے کیمپ کا دورہ کیا اور سہولتوں کا جائزہ لیا ،انہوں نے فلیڈ اسپتال بھی دیکھا جہاں زلزلہ متاثرین کو طبی امداد دی جارہی ہے۔

نیپالی آرمی چیف نے زلزلہ متاثرین کی مدد پر پاک فوج کی کوششوں کی تعریف کی اور انتظامات پر اطمینان ظاہر کیا۔

دوسری جانب نیپال میں تباہ کن زلزلے کے بعد امدادی کارروائیاں جاری ہیں،  زلزلے کے نتیجے میں ہلاکتوں کی تعداد 7000 سے تجاوز کر چکی ہے، ملک کےدوردراز علاقوں میں اب بھی لاتعداد افراد ابھی پھنسے ہوئےہیں۔

نیپال میں زلزلہ متاثرین کے لئے بڑے پیمانے پرامدادی کارروائیاں جاری ہیں اور دور دراز علاقوں میں امداد پہنچانے کا سلسلہ شروع ہوگیا ہے، نیپالی حکام نے عالمی برداردی سے دوردراز علاقوں میں امداد پہنچانے کے لئے ہیلی کاپٹرز فراہم کرنے کی اپیل کی تھی۔

پاکستان سمیت امریکا، چین، بھارت اور دیگرملکوں کی امدادی ٹیمیں زلزلہ متاثرین کی امداد میں مصروف ہیں، کٹھمنڈو کی زیادہ ترعمارتوں کو ناقابل رہائش قراردے دیا گیا ہے، ایک سوایک سالہ شخص سمیت دو خواتین کو آٹھ روز گزرنے کے بعدملبے سے زندہ نکال لیا گیا۔

حکام کا کہنا ہے کہ مزید کسی شخص کے زندہ بچنے کا امکان کم ہے، دوردراز علاقوں میں امدادی ٹیموں کی رسائی کے بعد ہلاکتوں میں اضافے کا خدشہ ہے۔ ان علاقوں میں سیکڑوں افراد اب بھی امداد کے منتظر ہیں جہاں ملبے اورتودے گرنے کے باعث زمینی راستوں سے پہنچنا ممکن نہیں ہے۔

ماؤنٹ ایورسٹ سمیت مختلف علاقوں سے ایک ہزار کے قریب غیر ملکی سیاح بھی لاپتہ ہیں، زلزلے سے اکتالیس ہزار مکان مکمل طور پر تباہ ہوگئے جبکہ ڈیڑھ لاکھ کو نقصان پہنچا۔

Comments

comments

یہ بھی پڑھیں