اسلام آباد: وزارتِ داخلہ نے موبائل کمپنیوں کے چیف ایگزیکٹوز کا اجلاس طلب کرلیا ہے اور تین ماہ سے غیر استعمال شدہ سمز بند کرنے کا فیصلہ کرلیا ہے۔
ذرائع کے مطابق ہفتہ کو وزارتِ داخلہ میں طلب کئے گئے اجلاس میں سموں کی بائیومیٹرک تصدیق کے حوالے سے امور زیرِ غور آئیں گے، اجلاس میں موبائل کمپنیوں کے چیف ایگزیکٹو سمیت وزارتِ آئی ٹی کے حکام اور چیئرمین پی ٹی اے بھی شریک ہونگے ۔
ذرائع کے مطابق وزارتِ داخلہ کی جانب سے اٹھائیس روز میں بائیو میٹرک تصدیق مکمل کرنے کا کہا جار ہا ہے، موبائل کمپنیوں کا مؤقف ہے کہ تیرہ کروڑ سے زائد سموں کی تصدیق اتنی جلدی ممکن نہیں اور ایک ساتھ تمام سموں کو بند کرنے سےایک نیا بحران کھڑا ہوجائےگا۔
کمپنیوں کا کہنا ہے کہ رواں سال اگست سے ملک بھر میں سم بائیو میٹرک تصدیق کے بعد ہی فروخت کی جارہی ہیں۔
ٹیلی کام ذرائع کے مطابق ابتدائی طور پر ایسی سمیں جنھیں گزشتہ تین ماہ سے کسی بھی صارف نے استعمال نہیں کیا، انھیں بند کر دیا جائے گا اور بائیو میٹرک تصدیق کے بعد دوبارہ سمز جاری کی جائیں گی۔
صارفین کے زیرِ استعمال سمز کو بھی بائیو میٹرک تصدیق کے مرحلے سے گزارنے کی حکمت عملی تیار کی جارہی ہے۔
