بنوں : متاثرین وزیرستان کےعمائدین اور پاک فوج کا گرینڈ جرگہ بنوں میں منعقد ہوا۔میجر جنرل جمیل اختر راؤ نے کہا کہ وزیرستان سمیت دیگرقبائلی علاقوں کو پرامن بنانےکےلئےپاک فوج نےقربانیاں دیں،آئی ڈی پیز کی واپسی کےلئےتیاریاں کی جارہی ہیں۔
تفصیلات کے مطابق بنوں میں متاثرین وزیرستان کے مسائل اور ان کے حل سےمتعلق عمائدین اور پاک فوج کاگرینڈ جرگہ ہوا۔جرگے سے خطاب میں میجر جنرل جمیل اختر راؤ کا کہنا تھا کہ اب تک وزیرستان متاثرین میں چار ارب روپے تقسیم کیے جاچکے ہیں۔
باون ہزار روپے فی خاندان دیئے گئے ہیں جبکہ چھتیس ہزار ٹن راشن تقسیم کیا گیا۔ڈھائی لاکھ مریضوں کا علاج کیا گیا ہے۔ بکا خیل کیمپ میں شیلٹر اسکول،حجرے اوراسپورٹس گراونڈ بنائے گئے ہیں۔
راشن کے حصول کو آسان بنانے کےلیے تین مزید ڈسٹری بیوشن پوائنٹس کھولے جارہے ہیں۔سینئر فوجی افسرنےبتایا کہ شمالی وزیرستان میں بارود کی فیکٹریاں متاثرین کی واپسی سے پہلے کلیئر کی جارہی ہیں۔ اور وہاں دہشت گردوں کو پھر کبھی واپس نہیں آنے دیں گے۔
