اسلام آباد : نامزد چیف جسٹس آف پاکستان جسٹس قاضی فائز عیسیٰ کا کہنا ہے کہ آزادی اظہار رائے ہر شہری کا بنیادی حق ہے، آپ رائے سے اختلاف کرسکتے ہیں مگر سچ سے انکار نہیں کرسکتے۔
تفصیلات کے مطابق نامزد چیف جسٹس جسٹس قاضی فائزعیسیٰ نے سپریم کورٹ پریس ایسوسی ایشن سے خطاب کرتے ہوئے کہا کہ آزادی اظہاررائے ہر شہری کا بنیادی حق ہے ، جتنی باتیں شہریوں کو پتہ چلیں گی ان میں اچھی بھی ہونگی بری بھی ہوں گی۔
جسٹس قاضی فائزعیسیٰ کا کہنا تھا کہ آئین کی شق 19 اے کے مطابق ہر چیز جس کی عوامی اہمیت ہے وہ آپ معلوم کر سکتے ہیں اور ایک صحافی ہونے کے ناتے آپ یہ معلومات لوگوں کےلئے جمع کرتے ہیں۔
نامزد چیف جسٹس نے کہا کہ جج آئین وقانون کے دائرے میں کام کرتاہے اور ذمہ دارانہ صحافت وقت کی ضرورت ہے، صحافی اورجج ہمیشہ سچ کی تلاش میں رہتے ہیں، سچ سچ ہی رہتا ہے انصاف پر ہر آدمی کی اپنی رائے ہوسکتی ہے۔
ان کا کہنا تھا کہ مثبت صحافت کا معاشرے پر اچھا اثر قائم ہوتاہے ، خبر اور رائے میں فرق ملحوظ خاطر رکھنا چاہیے، آپ رائے سے اختلاف کرسکتے ہیں مگر سچ سے انکار نہیں کرسکتے۔
یہاں جوٹی وی پر آتا ہے صحافی بن جاتا ہے مگر دنیا میں ایسے نہیں ہوتا ، جھوٹ بولنا مشکل ہوتا ہے اور سچ کا ہمیشہ مثبت نتیجہ نکلتا ہے، دنیا کے تمام مذاہب میں سچ کو فوقیت دی گئی ہے ، آپ کو جھوٹ یاد رکھنا پڑتا ہے مگر سچ کو نہیں، صحافی، ججز اور ہر کسی کو کہوں گا سچ بولیں۔
