واشنگٹن: امریکہ میں مقیم پاکستانیوں کومشین ریڈ ایبل پاسپورٹ حاصل کرنے میں شدید مشکلات کا سامناہے۔
پاکستانی نژاد امریکیوں کیلئے مشین ریڈ ایبل پاسپورٹ حاصل کرنے کا مسئلہ سنگین صورتحال اختیار کر گیا ہے، محکمہ خارجہ اور محکمہ پاسپورٹ کے مابین اختیارات کی جنگ امریکہ میں رہنے والے پاکستانیوں کو مہنگی پڑنا شروع ہوگئی۔
سفارتی ذرائع کے مطابق واشنگٹن، ہیوسٹن اور شکاگو میں مشین ریڈ ایبل پاسپورٹ کی مشینیں موجود ہونے کے باوجود پاسپورٹ نہیں بنائے جارہے جبکہ کینیڈا کے شہر وینکو ور میں بھی پاکستانی قونصلیٹ میں پڑی پاسپورٹ کی مشینوں کو زنگ لگ گئے ہیں۔
ذرائع کے مطابق گزشتہ تین سال سے واشنگٹن، ہیوسٹن ، شکاگو اور وین کوور میں دفترِ خارجہ اپنا افسر جبکہ محکمہ پاسپورٹ اپنا افسر لگانا چاہتے ہیں۔
واشنگٹن اور ہیوسٹن میں گزشتہ تین سال سے مشینیں موجود ہونے کے باوجود افسران کی تعیناتی نہیں ہوسکی، شکاگو میں چند دن پہلے مشین ریڈ ایبل پاسپورٹ کی تنصیب کی گئی تاہم پاسپورٹ افسر موجود نہیں۔
اس صورتحال میں واشنگٹن میں پاکستانی سفارت خانہ بدستور مینیول پاسپورٹ جاری کر رہا ہے جبکہ انٹرنیشنل قوانین کے مطابق 26 نومبر سے مینویل پاسپورٹ کسی بھی ائیر پورٹ پر قابل قبول نہیں ہوں گے۔
انٹرنیشنل سول ایوی ایشن آرگنائزیشن مینویل پاسپورٹس کے حوالے سے 26 نومبر 2015 کی ڈیڈ لائن جاری کرچکی ہے۔
